தேவதையும் சூப்பர் ஹீரோவும்

"அம்மா என்ன கேட்டாலும் தருவாங்க"
என்றபோது தேவதைக்கதைகளின்
தேவதைகள் அம்மாவின் முகம் சூடிக்கொண்டன!

"எங்க அப்பா கிட்டே சொல்லிடுவேன்"
என்ற நட்புமிரட்டல்களின்போது
சூப்பர் ஹீரோக்கள் அப்பாவிடம் தோற்றுத்தான் போனார்கள்!

வாழ்வின் சில பக்கங்கள் திரும்பிய பின்னர்
பயண நேர மூட்டைகளை நான் தூக்கத் தொடங்கியபோதும்,
சிறுதூர நடைக்குப் பின்னர் அவர்கள் மூச்சிரைத்து அமரும்போதும்
மூளைக்கு எட்டுகிறது!
தேவதைகளுக்கும் சூப்பர் ஹீரோக்களுக்கும்
வயசாகும் தான் போலிருக்கிறது!

மீண்டுமொரு பேருந்துப்பயணம்

நீ அடித்துப் பிடித்த அந்த
இருவருக்கான பேருந்து இருக்கையில்
தொந்தரவுகள் குறைந்த
ஜன்னலோரத்தை எனக்களித்து
மீதமுள்ள இடத்தில் அமர்கிறாய்
ஒரு பெருமூச்சுடன்!
ஜன்னல் கதவை
மூடிக் கொள்கிறோம்,
நமதாகிறது அவ்வுலகம்!
துப்பட்டாவைப் போர்த்திக்கொண்டு,
தலைமுடியைத் தூக்கி முடிகிறேன்
ஓய்வுக்கான ஏற்பாடு !
அயர்வும், நீ இருப்பதாலான பாதுகாப்பும்
சாய்க்கிறது என்னை, வசதியான உயரத்திலுள்ள
உன் தோள் மேல்!
விழிமூடுதலும் நித்திரையும்
சேர்ந்துகொண்டு விடுகின்றன விரைவில்,
நீ எப்போது உறங்கினாய் என்று
அறியும் விழிப்பில் இல்லை நான்!
நம் சாலையின் நெஞ்சுக்குழியில்
இறங்கிப்பார்க்கும் பேருந்தின் முயற்சியில்
ஆடிப்போய் எரிச்சலோடு விழிக்கிறேன்,
திறவாத கண்களுடன்
முட்டிக்கொள்கிறாய் முன்னிருக்கையின் பின்புறத்தில்,
அதற்கு முன்பே தன்னிச்சையாய்க்
கை வைத்திருக்கிறாய், என் தலை
முட்டிக்கொள்கிற வாய்ப்பிருக்கிற இடத்தில்!
அப்பா! இடித்துக்கொண்டது நீ தான்!
உறைக்கிறது எனக்கு!!!

உயரப் பறப்போம்!

பறவைகள் அரசவைக் கூட்டமொன்று
நடந்த இடம் நகரோரக் குன்று,
வருகைப் பதிவில் குறைந்தது ஒன்று
கண்டுபிடித்தார் காகம்தானென்று!

அமாவாசை இன்றென்றது பருந்து,
காகத்திற்கு கிட்டிடும் அறுசுவை விருந்து
பசி, பட்டினி என்று படுகின்றோம் கஷ்டம்,
காகத்திற்கு மட்டும் அடித்தது அதிர்ஷ்டம்!

உணவளிக்காவிட்டாலும் எம்மை
உணவாக்காது இருந்தால் நலம் ,
"சிக்கன் பெயரால் சின்னாபின்னம்"
வடித்தது கோழிக்கண்ணீர்!!

காக்கையோடு எம்மையும்தான்
தம் சாதி என்றான் கவிஞர்கோ,
அலைபேசி கோபுர அட்டூழியத்தால்
அழிந்தது குருவி எம் இனம் தானே!

தேசியப் பறவை என்றிட்டார்,
தேடித் தேடிக் கொன்றிட்டார்!
அழகால் விளைவது ஆபத்து
அறியும் உலகம் எம்மால்தான்!

எதிர்காலம் சொல்லச்சொல்லி,
நிகழ்காலம் இழக்கச் செய்கின்றார்
காகத்திற்கேன் இல்லையொரு கூண்டு?
அது மட்டும் களிக்கிறது உறவோடு உண்டு!

புலம்பித் தீர்த்த வேளையில் வந்தது
காகம் வெட்கச் செய்ய
கிடைத்த உணவெல்லாம் உள்ளது பொந்தில்,
அனைவரும் வாரீர் விருந்து செய்ய!

காத்திருப்பு

நடையின் சத்தத்தைக் குறைக்க முயன்றபடி
உடையின் சுத்தத்தையும் சரிபார்த்துக்கொள்கிறேன்,
திறந்திருக்கும் கதவைத் தட்டுவதுகுறித்து
மனமொரு பட்டிமன்றம் நடத்துகிறது,
உள்ளிருப்பவர் பார்க்குமுன் அவசரமாய்
புன்னகையொன்றைப் பூசிக்கொள்கிறேன்!
பதிலுக்கொரு புன்னகையை எதிர்பார்த்தபடி
வாழ்த்தொன்றை உதிர்க்கிறேன்,
எதிரிலிருப்பவர் சிநேகப்புன்னகையும்
சரி செய்துவிட முடியவில்லை என் பதற்றத்தை!
அடுத்த இருபது நிமிடங்கள்
சற்று வேகமாய்த் தான் கடந்தன,
நன்றி ஒன்றைச் சொல்லிலும்
பார்வையிலும் செலுத்தி வெளியேறுகிறேன்.
கடந்த காலத்தின் கசப்புகளும்
இடை இடையே இனிமைகளும்
நினைவலைகளில் எழும்புகின்றன,
பயம் குறைந்து நம்பிக்கையும்
நம்பிக்கை குறைந்து பயமும்
மாறி மாறி ஊற்று எடுக்கின்றன!
வாசிப்பவர் வாயசைவை கவனித்தபடி அமர்ந்திருக்கிறேன்,
நேர்முகத்தேர்வில் தேறியவர் பெயர் பட்டியல்