தேவதையும் சூப்பர் ஹீரோவும்

"அம்மா என்ன கேட்டாலும் தருவாங்க"
என்றபோது தேவதைக்கதைகளின்
தேவதைகள் அம்மாவின் முகம் சூடிக்கொண்டன!

"எங்க அப்பா கிட்டே சொல்லிடுவேன்"
என்ற நட்புமிரட்டல்களின்போது
சூப்பர் ஹீரோக்கள் அப்பாவிடம் தோற்றுத்தான் போனார்கள்!

வாழ்வின் சில பக்கங்கள் திரும்பிய பின்னர்
பயண நேர மூட்டைகளை நான் தூக்கத் தொடங்கியபோதும்,
சிறுதூர நடைக்குப் பின்னர் அவர்கள் மூச்சிரைத்து அமரும்போதும்
மூளைக்கு எட்டுகிறது!
தேவதைகளுக்கும் சூப்பர் ஹீரோக்களுக்கும்
வயசாகும் தான் போலிருக்கிறது!